柬埔寨「第一股」 逾半大戶係中國人

【明報專訊】柬埔寨籌備咗足足7年嘅股市噚日終於開鑼，話就話正式進入資本市場時代，不過就只係得一隻國營企業金邊水務局上市咁大把，而且呢隻「柬埔寨第一股」嘅認購人士當中，有一半大戶都係中國人，估唔到祖國同胞咁支持友好鄰國嘅金融發展。


柬國股市 籌備7年才開鑼

之但係祖國同胞咁撐「柬埔寨第一股」，都係為咗一個錢字，事關佢哋認為，新開嘅股票市場一定具吸引力，而首先發行嘅股票就更加有升值潛力，好似之前越南股票市場開市，首批上市嘅都身價暴升，所以今次輪到柬埔寨開股市，呢班極具市場觸覺嘅「春江鴨」，又點會唔聞風而至呢。


話時話，呢班「春江鴨」除咗透過外資銀行將資金匯入柬埔寨之外，原來都有部分係利用地下錢莊將資金流入，唔知日後柬埔寨嘅上市公司愈嚟愈多時，啲地下錢莊又會唔會愈開愈旺呢？