趙國雄鬼馬扮記者 訪問愛女

【明報專訊】置富信託（0778）舊年純利升咗9％，難怪人稱「樓神」嘅公司主席趙國雄噚日喺業績會上心情勁靚，仲扮埋記者，訪問女兒公司的發展計劃添。


愛女加盟置富9年 現職副CEO

噚日趙國雄及公司副行政總裁趙宇「父女檔」上陣，當趙宇介紹完公司喺2月份完成咗兩個新嘅收購項目後，趙國雄即刻鬼馬咁講﹕「等我扮記者訪問Justina（趙宇嘅洋名），公司嚟緊仲有冇收購項目啊？」，小琴同一眾行家即刻忍唔住笑晒。


唔講唔知，原來趙宇2002年英國畢業後即加入置富，之後不斷幫手進行商場收購項目，前年仲成功帶集團喺新加坡同香港兩地上市，獲委任為執行董事兼副行政總裁，家佢仲同時身兼律師、特許財務分析師資格及政協常州市委員嘅學歷同資格，認真係「虎父無犬女」！