陳德霖「招認」坐過遊艇

【明報專訊】呢排議員追查官員有冇收受利益問到㷫起，噚日金管局總裁陳德霖去財經事務委員會進行季度匯報時，議員連佢都窮追猛打，實行當佢係煲呔曾咁審問。


咁又難怪，陳德霖手握百業之母銀行的管治權力，若論權力之大，隨時不下於特首。立法會議員甘乃威要求佢交代有冇接受他人款待，例如乘坐私人飛機、遊艇，陳德霖回應指自己無坐過私人飛機，曾經坐過遊艇「遊船河」，但強調「無去其他地方、無過夜」，不過佢就唔透露邊過招呼佢遊船河。


曾申報出訪內地所收贈品

佢喺立法會上話，金管局所有員工亦受公務員防止賄賂條例規管，申報機制與一般政府機關無異，「同事會向我申報，我會向財政司長申報」，甘乃威再追問，陳德霖自己曾作出多少次利益申報？陳指曾就出訪內地後收受贈品等事宜作出申報。


自從特首多番接受款待，搞出「利益門」事件後，以後凡公職人員接受富豪款待，都要諗清諗楚後果可以好嚴重。


email:piano@mingpao.com