「送禮都唔知送畀邊個」

【明報專訊】小琴早前聽一個上海基金經理講，內地零售市道差，其實好關乎胡總「反腐倡廉」嘅推行。當時聽到就當做笑話，今日先知原來都有啲「理據」。喺內地經營多份主流財經生活雜誌嘅公司，即係現代傳播（0072）嘅行政總裁黃承發，噚日喺一個飯局上話，今年第1季北京地區嘅廣告收入表現麻麻。至於原因，黃承發就笑住講，主要因為高檔手表嘅廣告投放少咗，大概係因為內地政府臨近換屆，令到有人想送禮都唔知送畀邊個。


雖然手表廣告少咗啲，現代傳播仍然上調咗今年廣告投放價錢8到15個巴仙，八成客戶都接受到加價。黃承發介紹說，以今年第1季廣告訂單來睇，香港零售市道仍然暢旺，上海、北京表現都過得去，全部達到內部指標，唯獨以快消品為主嘅廣州，生意唔太好。


講開現代傳播，公司響2009年上市以來已經三度快速變身。上市嗰陣，公司定位係領先嘅時尚雜誌平台。上咗市後，公司發現個Trend變咗，就諗住喺2010年打造公司成為電視多媒體平台。點知到咗2011年，個Trend又轉，現時重新定位，想做領先移動媒體平台，即係以iPhone、iPad代替紙張承載雜誌、視頻內容。黃承發話，家投資回報率大約有成40個巴仙，「所以我哋就算有新計劃，都仍然可以派到息。」


email:piano@mingpao.com