老翻出iphone牌煮食爐

【明報專訊】內地多冒牌就全世界都知㗎啦，不過有時盜版商嘅創意都真係估佢唔到。話說小琴噚日網上睇到前幾日公安係武漢又搜到批蘋果冒牌貨，本來諗住無咩特別，不過望真啲，原來今次唔係手機，竟然係煤氣煮食爐，個爐上面仲大大隻字寫住iphone，真係令人又驚又喜。


蘋果產品出名外形靚，不過今次「中國蘋果有限公司」出嘅煮食爐可以話係一啲誠意都無，除咗寫住iphone之外，外表上，根本就係一個普通到唔可以再普通的煮食爐。最不堪嘅個爐假扮有熄火保護裝置，但實質完全無用形同虛設。


我哋先唔好談論個爐安全問題，費事你哋話小琴歧視國貨，我哋今次探討吓佢marketing問題。


小琴覺得冒牌唔值得鼓勵，不過為求銷量，商家借大牌子嘅名用吓亦都係無可厚非。問題係爐具中嘅名牌應該係標榜安全嘅樂信、氣霸等，而絕對唔係潮牌手機iphone。冒樂信個名都可以呃吓買家，等佢哋對個安全品質有信心，從而增加銷量。咁冒蘋果又有咩意思呢﹖


徒具虛名 難吸引家庭主婦

斷估個iphone爐嘅目標客戶都唔會係內地嘅潮童，無論佢哋幾沉迷iphone，都唔會買個爐番屋企炫耀。個iphone爐更加唔會吸引到一般嘅家庭主婦，有啲知識嘅都知iphone係一個phone嚟嘅，再唔係就連iphone都未聽過，咁又點會有名牌效應呢﹖


其實，印住iphone字樣，除咗等啲執法者一眼就睇得出佢係冒牌之外，真係一啲實用價值都無。小琴認為「中國蘋果有限公司」真係要認真諗下公司嘅市場策略。


email:piano@mingpao.com