中證監改革A股IPO 搵fb做參考

【明報專訊】facebook上市全球關注，香港呢邊都有唔少人有興趣睇吓可唔可以沾沾邊賺番筆，原來就連內地證監部門都好留意呢單美國歷史上最大規模嘅科技公司IPO，之不過中證監唔係關心可唔可以賺錢，而係以呢單IPO為A股改革做參考。


內地媒體話，前幾日中證監就開咗個小型座談會，搵嚟證券媒體同行業人士參加，專門研究facebook發行機制、融資額、資金用途、上市前後股權結構變更，同埋美國監管部門角色等等問題。


事關喺中國現有IPO申請條件嚟講，facebook想喺中國上市一定「槍斃」，因為冇具體說明集資用途、風險因素披露又特別多，按發行監管要求特別嚴嘅A股市場嚟講，中證監肯定唔會受理。


但係中證監新主席郭樹清（圖）上場後，銳意改革新股發行體制，放寬上市規管，所以難怪佢地會以facebook嚟借鏡美國較寬鬆嘅上市規則。