匯力王總 派限量閃卡

【明報專訊】讀書嗰陣，成班同學仔除咗到信和買明星相外，另一樣就係儲Yes卡喇。以前，要買張黎明呀、華仔嘅閃卡，閒閒地都要捱成個禮拜麵包先得。噚日小琴收到張卡片，那些年嘅回憶，一次過勾番起晒。


話說隻匯力資源（1303）趁臨收爐之際，急急腳要搭埋尾班車趕上市。噚日記者會完咗，走埋去同王總換卡片嗰陣，王總笑笑口咁話，呢啲係限量版嚟架。小琴心諗，咪又係紙一張，有乜咁大不了。


誰不知一拎上手，仲以為佢派錯咗自己張職員證出嚟，塑膠卡片上面，印咗王總幅靚相。最正就係，喺燈光嘅反射下，仲有條紋閃閃下，十足十張閃卡咁。唔止㗎，仲有埋疑似高科技雷射打印「security」字樣，想老翻都無咁易咁話。


小琴行走江湖咁耐，換嘅卡片間中都會有啲驚喜嘅設計，不過講到最爆喇喎，暫時要數王總呢張限量珍藏版。唔知第時會唔會出多幾個特別版，畀啲粉絲儲下呢？