恒生歌王梁永祥 過檔新鴻基金融

【明報專訊】有恒生歌王之譽嘅梁永祥，早排辭咗恒生（0011）執行董事及個人銀行業務主管，4個月之後，終於公布佢嘅新去向，都係做返金融，跳槽過去新鴻基公司（0086）做副行政總裁，兼全資附屬新鴻基金融嘅CEO，下年1月1日生效。


鍾意唱張學友歌

聽講梁永祥離開恒生之後，不少大公司都打佢主意，佢不嬲強項係銀行同埋信用卡業務，新鴻基金融銳意由經紀行升格為提供全方位服務嘅財富管理公司，唔知對佢會唔會係一個重大嘅挑戰呢？但相信佢見慣風浪，今次實難唔到佢啦！

梁永祥以往喺恒生一直都有歌王之稱，最鍾意唱歌神張學友嘅歌，以往亦不時喺恒生一年一度嘅傳媒蛇宴中大顯歌喉，但喺今年啱啱舉行嘅蛇宴之中，無咗呢位歌王獻技，小琴同好多記者朋友都總係覺得差咁啲嘢咁，唔知梁永祥過檔之後，會唔會繼續閒時同班員工唱吓K過吓癮呢？