國電科環 認購率低破紀錄

【明報專訊】又有新股破紀錄？無錯，不過小琴講緊嘅紀錄係公開認購百分比再創新低。近排招股嘅國電科環（1296），因為反應唔好而要縮減集資額上市，睇番通告，原來國電科環公開招股得4.8%認購，仲差過10月上市嘅中信證券（6030）嘅8.9%，認真陰功。


近排新股認真唔多掂，明星新股周大福（1929）同新華人壽（1336）一上市就變咗潛水艇，海通證券（6837）同必瘦站（1830）搞完一大輪後最終更加上唔到市，國電科環噚日就發咗個通告，將發售股數減少一半到10.9億H股，公開發售有「0.048倍」認購，換言之即係得4.8%，上市日期就由21號改到30號。


相對今年兩大「冷門新股王」，國電科環已經砌低咗公開發售8.9%認購嘅中信證券，成為今年最低認購百分比新股，不過「遺憾」嘅係，另一「冷門新股王」的紀錄仲未被打破。事關罕王（3788）公開發售得76人認購，有488人認購嘅國電科環無緣成為最少人認購嘅新股。