夏佳理復仇失敗

【明報專訊】噚日係特首跑馬仔爭入場券嘅選委投票日，氣氛唔算熱烈；不過真正嘅賽馬，噚日就有好幾場國際一級賽事。Emily早前講過，港交所主席夏佳理隻愛駒「紅色禮物」，會喺噚日嘅「香港瓶」上演一場「復仇記」，可惜「紅色禮物」最終都係跑第三，復仇失敗。


話說「紅色禮物」喺上個月嘅「墨爾本盃」度，僅僅輸咗個馬鼻畀另一隻馬「多利得」，屈居第二，呢個些微差距，係墨爾本盃151年歷史以嚟最短嘅勝負距離。噚日兩隻馬喺香港瓶賽事再戰，結果「多利得」又贏，而夏佳理隻「紅色禮物」就同大熱門嘅「銀塘勝景」同時衝線，影相結果係兩隻馬一齊跑第三。今次呢場香港瓶，頭馬獎金有成790萬港紙，至於上次墨爾本盃，冠軍獎金更有360萬澳元。