中石油買豪車 解畫愈描愈黑

【明報專訊】早兩日小琴先至講到，中石油（0857）新疆油田公司因為用近百萬買車而畀人話浪費，中石油好快出調查報告解釋話係因為新疆地形複雜，所以先至要買架性能好啲嘅車，仲話架車2001年買入，到依家已經折舊唔少。

問題係，細心嘅內地媒體發現，中石油講果款越野車，2003年先至引入中國，唔通中石油早料先機，提早用未來車？

對於呢個疑問，新疆油田公司宣傳部都好快回應，佢地話，實際上架車係2005年買入嘅，但點解份報告會寫2001年呢，因為鍵盤上1同5既位置離得好近，唔小心打錯咗喎。

你話新疆地形特別，所以要買性能比較好嘅車代步，小琴覺得解釋都好合理；之不過呢，如果話鍵盤上1同5既距離近所以打錯字，大家睇下平時用開嘅鍵盤，2同4直頭響1隔離添，咪仲近？最重要係，呢件事中石油解畫解到愈描愈黑，只會令人更加懷疑。