金管局數保薦人9宗罪

【明報專訊】新股近排復活齊齊鬥快搶錢，金管局就喺呢個時候出咗份保薦人審查報告，力數保薦人9宗罪，唔知係想贈興，定係想提醒投資者抽新股時要提高警覺。心水清嘅朋友可能記得，證監會早排都出過啲類似嘅報告，點解金管局要「回帶」？皆因香港保薦人大部分由證監管，但有幾間銀行都有做新股保薦，咁自然係歸金管局管啦。

遭釘牌財務總監 招股書冇披露

金管局由舊年第四季到今年上半年喺5間銀行實地考察，調查佢哋保薦新股時功夫做得足唔足，最終總結咗9大個案，其中一個較離譜嘅，就係有保薦人留意到佢客仔喺招股書披露某客戶嘅銷售數字，比起嗰位客戶喺自己嘅招股書所披露嘅數字大咗兩倍，但保薦人都只係進行簡單嘅審計確認，冇作出額外盡職審查。

另外有個case，就係有保薦人嘅客戶喺招股書聲稱，公司財務總監係某一年成為執業會計師，但其實文件顯示嗰位財務總監嘅牌照喺嗰段時間被註銷，但招股書就冇披露到呢一點。金管局話報告副本已經送交證監，小琴希望監管機構繼續睇緊啲保薦人質素，咁先保障到投資者嘛。