商場吸深圳客 20蚊包來回

【明報專訊】仲有1個月就到聖誕節，唔少商場趁住佳節出盡法寶力谷人流同營業額，內地客自然成為商戶嘅目標，有商場以卡通人物佈置吸人流，而新地（0016）就以「着數」吸客。新地噚日喺大埔超級城介紹一連串聖誕節活動，邀請咗名模Ana R.同徐靜雯（Jenny）助興。新地租務總經馮秀炎話花喺大埔超級城嘅宣傳費達到800萬，同時宣布三大招數吸內地客。

推現金套票 三折購物

首先，旅客用20蚊人仔就可以坐住「抗通脹巴士」，來回深圳至大埔超級城，比由羅湖搭車到大埔，足足慳番一半車錢。另外，新地首次同內地ＱＱ網合作搞團購，推出「潮買潮食套票」，由下個月開始可以用50蚊人仔，下載價值200港元嘅百貨公司或者餐飲現金套票，計落等於三折購物。最後當然唔少得搞番啲購物團谷谷消費啦，新地將會搞20個購物團，涉及約1000人，照顧番廣東省同胞。