匯控渣打 失落今屆企管披露大獎

【明報專訊】為嘉許一班將年報整得易睇又豐富嘅上市公司，會計師公會主辦嘅「2011年最佳企業管治資料披露大獎」獲獎名單噚日出爐。小琴睇番張得獎名單，但見中電控股（0002）連續9年勇奪該組別頭獎「鑽石獎」，但就唔見過去10年，年年攞獎嘅匯控（0005）同「鑽石獎」前身渣打（2888）。

雖然副會長趙麗娟話，唔上榜未必就代表做差咗，只係因為人哋做得更好啫。不過佢都有講到，除咗年報之外，評審都會睇番公司平時嘅表現，如果言行有別都唔會頒獎畀佢。小琴就想起呢排見到內地媒體話，外資行對理財產品巨虧投訴有啲怠慢，料想副會長「不進則退」之說應是都提醒番落榜者，唔好太過自信。當然，小琴都要恭喜一上榜就得「鑽石獎」嘅英國保誠（2378）。