中石油為天價車解畫

【明報專訊】作為最有錢嘅國企之一，中石油（0857）啲內部開支成日都受都關注，用多咗用貴咗就會畀人話浪費！奢侈！好似前日咁，中石油下面嘅新疆油田公司就畀媒體指摘佢哋天價買車專門侍候高層，兩架越野車每架都過百萬。

不過中石油今次反應好快，話睇到報道之後，立即組織調查小組去調查件事，而且調查結果亦好快咁噚日出爐。個結果就話，兩架越野車其實已經買咗10年，當年買嗰陣，價錢分別係80萬同46萬左右，折舊後得返16萬同7.6萬。

雖然唔係過百萬，但10年前80萬架車都唔係平架喎，中石油就解釋，新疆地形既複雜，公司站點距離遙遠，所以要用越野車代步，而且要求嘅配備一般高於內地標準，所以先至會比較貴。