政協方黃吉雯 八千萬勇購雅賓利

【明報專訊】呢排個樓市似淡非淡，正當十大屋苑唔少出現零成交之際，碩果僅存嘅二手成交價錢又仲係好價喎，尤其係豪宅價更加係十分硬淨，好似業主非富則貴嘅中半山，土地註冊處資料就顯示，該區指標豪宅之一嘅雅賓利，新近錄得一宗8000萬元大額成交，呎價高見31385元，買家不是別人，正是全國政協委員方黃吉雯，佢似乎對近排樓市詭異嘅氣氛冇有怕。

上手業主勁賺2.26倍

方太今次買入嘅單位面積有成2549方呎，對上一手業主喺2002年以2450.9萬元購入，今次轉手獲利5549.1萬元，物業升值2.26倍，相當和味。

有口痕友形容方黃吉雯今次「心口掛住個勇字」，咁小琴覺得，有實力嘅買家自然「勇」得起，方太話晒係全國政協委員，仲係前任香港市政局議員、香港立法局議員、香港行政會議成員，佢早於1988年已獲封為非官守太平紳士，1999年仲攞埋金紫荊星章，以佢嘅身分地位，豪得起有餘啦。