蒙能未投產 先發盈喜

【明報專訊】冇營業收入都可以有錢賺，你聽過未？小琴唔係吹水，講緊嘅就係新世界發展（0017）主席鄭裕彤有份揸嘅蒙古能源（0276），呢間仍未投產嘅煤礦公司噚日就發盈喜，話截至今年9月底嘅6個月會有盈利喎！

喜從何來？蒙能解釋，2011至2012財年上半年公司發行在外嘅可換股票據，當中按公平值入帳（mark-to-market）嘅衍生部分錄得重估計收益，係盈利嘅主要來源。即係話，呢一部分係會計處理嘅結果，並無現金流入，所謂嘅盈利只係紙上富貴，無真金白銀落袋。

因公平值重估 獲紙上收益

講開蒙能呢間公司，自從2007年中由電訊股新世界數碼「變身」為資源股，4年幾以來一直令市場又愛又恨。2007至2008年中轉型初期，市場仍好景，於是佢嘅股價一度由幾毫子被炒高至18蚊，但2008年金融海嘯後，因為旗下嘅項目阻滯多多，股價由天堂跌落谷底。2009至2010年股市反彈，佢又曾跟隨回升至5蚊，令小股東重燃翻身嘅希望，但無奈佢嘅項目遲遲未見投產，於是股價再一次打回原形。

在此之前，蒙能已經連續3年冇錢賺，盈警發咗一年又一年。無論如何，過去半個財年係蒙能自2008年以來首次「扭虧為盈」，都算是一個好嘅開始，希望佢以後更加生性，唔好再辜負小股東嘅血汗錢。

email:piano@mingpao.com