誤將百事當百勝 央視記者被幽一默

【明報專訊】最近有咩收購消息最受關注？咪就係康師傅（0322）想收購百事可樂中國業務囉，仲搞到百事班內地工人驚到要集體請假，驚換新老細會冇份工。所以單新聞咁受關注，噚日商務部例行記招，就有央視記者提出問題，之不過咁，佢問得奇怪少少，話點解「百事收購小肥羊」會獲得批准喎。
好彩商務部發言人沈丹陽都冇畀呢條問題「嚇親」，仲好爽快咁話，，百勝收購小肥羊已經獲得批准，百事呢，就係另一件事。咪係囉，家係百勝收購小肥羊，而百事，係畀康師傅收購嘛。
之不過咁，又唔可以話央視位記者錯晒，因為響1998年之前，百事同百勝係一家人，只係1998年陣百事將佢餐飲業務響紐約證券交易所分拆上市，先至有家百勝咋。