央視籲網民齊轟 中電信聯通壟斷

【明報專訊】內地央視上星期三高調批評中電信（0728）、聯通（0762）壟斷寬頻行業，唔到兩日即被工信部旗下媒體《人民郵電報》，用咗大半版頭版逐條批駁，仲話央視「混淆視聽，誤導公眾」。

不過，央視都唔係省油燈，呢個星期一就喺自己網站大開專版，質問「是不是壟斷？」又列晒所有調查文件，引述專家「電信聯通壟斷事實確鑿」，央視更加開咗在線投訴、投票專區，邀請任何喺三大電信運營商有過「唔合理或唔愉快經歷」嘅網民，「歡迎牢騷、歡迎投訴」，即時博得91巴仙投票網民嘅支持。

今次唔單止係兩大正牌官方媒體隔空開戰彈殼亂飛，網民仲爆料話《人民郵電報》斥駁央視嘅新聞當日一直霸佔百度頭條，搞得網民寫打油詩話「央視炮轟聯通電信，人郵報拔刀相助，百度幸災樂禍，百姓看在眼裏。」