畀雜誌唱無錢還 吉利憤發律師信

【明報專訊】噚日汽車股造好，特別係比亞迪更升成廿幾%，去返20蚊水平，但同樣係內地車企，吉利（0175）雖然都升6%，可惜老闆李書福就唔多開心，事關內地有本雜誌頭條新聞話佢當年為收購沃爾沃，不惜海外發行高息債券，為咗還呢筆「高利貸」，李書福陷入財政危機。

被傳問私募機構籌錢不成

份雜誌仲話，為咗還呢筆債，吉利今年上半年開始，秘密接洽多間海內外私募機構籌錢，但係遭到拒絕，因為呢啲私募機構對吉利嘅還款能力冇信心，認為融資風險太大。

講到咁嚴重，吉利立即有反應，響黃昏發出律師聲明，指摘份雜誌係揑造虛構事實，惡意中傷詆譭吉利同李書福嘅形象及聲譽，要求雜誌立即處理件事，仲話已經授權律師，會視乎雜誌嘅認錯態度去決定要唔要採取進一步法律行動。