抽水大王擊退印度裁縫

【明報專訊】舊年年初起，有位印度裔裁縫商人Rajkumar Daswani，一直想狙擊官永義旗下嘅永義實業（0616），不過呢單近年少見嘅股壇狙擊，最後以失敗告終，人稱Raja的Daswani高峰時期持有公司近三成股份，但最後都係敵不過「抽水大王」嘅反擊，以蝕本價賣返股份畀官家，損手以百萬元計。

事緣呢位Raja密密收集永義實業股份，由舊年年初超過5％而要披露，到今年中揸成29％，接近強制提出全面收購（GO）嘅界線，公司股價就由3毫幾子，一度飈升到8毫子。Raja多次同傳媒講，屬毫子股嘅永義實業嘅「合理價」應該係1.8元，又不諱言自己想入董事局，阻止公司成日供股向小股東抽水。

官永義9月反收購 逼對手蝕讓

據講Raja仲想拉攏第三大股東、韓籍人士Park Jong Yong，收購佢手上大概一成股份，諗住咁就可以超過母公司永義國際（1218）持有嘅31.7％，成為大股東，順理成章入局。點知官永義都有過牆梯，今年9月永義國際率先向Park提出收購，每股作價0.3元，跟住又用呢個價錢做全面收購（GO）。呢一着將Raja逼去死角，因為佢收集永義股票嘅平均價遠高過0.3元，接受GO即要蝕讓，最終Raja只有將1.54億股股份大部分賣出，只留低30萬股，佢做上市公司主席嘅夢想唔知幾時先實現到喇。

email:piano@mingpao.com