錦江酒店不務正業 四成現金去放數

【明報專訊】話說近排內地水緊，唔少上市公司撈埋借貸已經唔算罕見，好似小琴尋日就見到錦江酒店（2006）出通告，話借咗1.2億銀人民幣畀佢哋內地嘅生意拍檔崑崙飯店，年息有成6.8厘，撇開係咪不務正業嚟講，一年落嚟都賺返800萬元人仔利息，你都咪話唔和味呀！

近年借貸生意好做都不得了，唔單止中國信貸（8207）、遠東宏信（3360）呢啲本身已經做緊貸款生意嘅公司生意好到可以上市，就連主業原本大纜扯唔埋嘅上市公司都搞埋一份，好似民生國際（0938）同惠理（0806）咁，甚至乎大國企中移動（0941）都玩埋一份，你就估到生意有幾好做。

2006年上市嘅錦江酒店，下面不留都有間財務公司，每年做幾多生意就唔知，可能因為金額唔多所以一直無披露，不過今次借錢嘅崑崙飯店母公司上海國際集團，係佢哋旗下兩間附屬公司嘅主要股東所以需要披露，而且貸款金額1.2億元人民幣唔算少，皆因錦江去到今年6月底手頭現金約莫2.8億元人民幣，即係將手上超過四成現金借咗出去。