「大廚」到南蘇丹搞石油

【明報專訊】人稱「大廚」嘅黃坤喺靜咗一排後又有新動作，佢旗下嘅東方明珠（0632）早排就組咗個考察團去南蘇丹共和國訪問。無錯，係非洲嘅南蘇丹，團員名單除咗佢本人同副主席劉夢熊之外，仲有英國上議院議員Caroline Cox男爵夫人，實行想喺當地大搞石油生意咁話喎。

獲總統接見 歡迎去當地投資

東方明珠噚日出咗個通告，話佢哋組成咗個代表團，仲特登帶埋石油專家，專程去立國只有3個幾月嘅南蘇丹訪問，南蘇丹駐英國大使館政治及投資事務專員Wol Mayar Ariec全程照顧之餘，仲見埋佢哋總統基爾（H.E. Gen. Salva Kiir Mayardit），歡迎佢哋去當地投資。

做生意做到去南蘇丹？小琴即刻諗返起，當初蒙古能源（0276）去外蒙古、西伯利亞礦業（1142）去俄羅斯，仲有中聯能源（0346）去馬達加斯加，家香港啲上市公司生意真係愈做愈遠。

小琴噚日就打咗個電話畀黃坤，發現佢噚日夜晚7點幾都仲喺公司做緊嘢，佢就話雖然之前南蘇丹好似好混亂，但家政局已經開始穩定，每日生產原油高達50至60萬桶，已經成為非洲第五大產油國家，所以未來希望同南蘇丹建立起長期合作關係，喺當地大搞石油生意，不過家就仲未有嘢可以公布住。

email:piano@mingpao.com