新聞類別
財經
詳情#
【明報專訊】花旗國上市嘅大型連鎖飲食集團YUM（百勝集團）「嗒」我哋祖國小肥羊（0968）單刁噚日終於批咗，諗番起單刁前前後後都搞咗成半年有多，當時個市氣氛尚算可以，家就……真係此一時彼一時。小琴唔知百勝有冇後悔自己買「貴貨」，但係就知道祖國好多有併購概念嘅股份噚日乘勢而起，成為悶市中嘅奇葩。
主角小肥羊噚日收市升咗15個巴仙（附表），至於一度係基金寵兒嘅洗頭水股霸王（1338）都急升咗超過一成一，做酒嘅通天酒業（0389）亦飈一成，同可口可樂結唔成婚嘅匯源果汁（1886）都升9.7個巴仙，真係各種液體都炒併購概念。
憧憬可樂「翻撻」 匯源升近一成
小琴嘅芬佬朋友分析，話匯源炒上，都可以係憧憬佢同可口可樂「翻撻」，同時經一事長一智嘅阿爺又會放行喎。喺大陸做葡萄酒嘅通天酒業，喺內地甜酒產量排第一，大陸酒業股同洋酒合作有前科，好似王朝酒業（0828）其中一個主要股東正是法國人頭馬，所以內地酒業股成為外國人目標，亦唔出奇，所以又順便炒埋一份。
不過，近年霸氣盡失嘅霸王，又炒咩收購合併概念好呢？芬佬朋友就講笑，講到洗頭水，唔使諗一定係P&G（寶潔公司）啦！P&G呢個寶號又係來自花旗國，係目前全球最大嘅日用品公司之一，如果P&G睇中霸王，咁霸王都算搵到頭好住家咯！
回應 (0)
