新聞類別
財經
詳情#
【明報專訊】內地有咩拍賣會嘅受關注度堪比蘇富比？小琴可以話畀大家知，就係一年一度嘅央視廣告時段拍賣會。而響噚日舉行嘅2012年廣告拍賣會上，最重要時段之一嘅黃金檔第一集電視劇廣告，6個中標額當中，有一個竟然係香港上市公司生物動力（0039），內地媒體仲煞有介事咁形容，今次係央視18年嚟廣告拍賣歷史中，首次有「港資酒企」成功中標，中標金額為5000萬元人民幣。
小琴好奇，於是翻查下呢間公司資料，原來隻股份前身叫和寶國際，2001年上市，2006年主席因為挪用公司現金入獄，畀曾經喺哈爾濱啤酒集團任總裁嘅路嘉星收購咗，2008年改名生物動力。至於生物動力嘅業務，主要係酒精製品同動物飼料，同酒有關嘅業務，只係酒精飲品嘅零售分銷。
對於今次央視黃金檔廣告中標，新上任唔夠一個月嘅集團總經理韓東話，公司目標係打造中國最大酒業零售連鎖平台，幫助消費者同廠家直接建立聯繫，就好似國美電器嘅模式咁，所以要做「酒業國美」。
上半年現金結餘僅2400萬
但小琴想講呢，去年底路嘉星主席都話要大力發展動物飼料業務，但佢哋今年上半年已經蝕咗近3000萬，家陣手頭現金不過2000幾萬，真係唔知嗰5000萬廣告費可以點嚟。不過又咁講，路總係內地酒業老行尊，睇佢今次咁大手筆，似乎真係想大搞咁喎。
email:piano@mingpao.com
回應 (0)
