證券協會提名選委 201111111111遞表

【明報專訊】今年嘅11月都幾特別，好似本月2號，用阿拉伯數目字寫成嘅日期就係20111102，有人冠之以「世界完全對稱日」，意思係呢個日期數字左右對稱，調轉嚟睇亦完全一樣。至於今個禮拜五，即係2011年11月11日，大嗱嗱成六條「煙」，自然係唔少新人搶住呢個日子註冊。不過，連香港證券業協會都話趁熱鬧，特登揀喺當日「入表」，提名選委會（投票選特首嗰個會）嘅候選人喎。

擬推舉近7名候選人

今年9月上任證券業協會主席嘅馮煒能噚日話畀小琴知，佢哋打算喺11月11日嘅11點11分遞表。小琴反問，咁係咪提名11個會員呢？阿Brian馮就話冇咁多，大概會提名6至7個啦，名單仲斟酌緊。小琴再問，至少Brian本人一定有份？Brian都只係答「應該會」，始終冇畀明確答案。

其實選委會今日起開始接受提名，2011年11月11日11點11分係咪吉時，小琴真係要請教吓啲高人先知，不過小琴可以肯定，呢個時間日期夠晒gimmick，大家一定會記得。