新聞類別
財經
詳情#
【明報專訊】新鴻基地產（0016）郭氏家族爭拗好似平息咗一段時間，之不過原來大哥郭炳湘喺家族信託嘅權益爭拗問題一路都未解決，撞啱噚日新地旗下新意網（8008）公布第一季度業績，佢就話家族信託股份「存在嚴重爭議」，喺爭議解決之前，實行唔會喺文件上面簽名確認喎。
話說上年底郭氏家族信託基金重組，「郭炳湘的家人」成為受益人，湘少本人就無份，睇返新地、新意網嘅年報，統統都有強調呢一點。喺9月底出嘅新意網年報入面，湘少就講到明「於新鴻基地產和新意網股份之實際權益仍在爭議中」，到啱啱噚日公布嘅新意網第一季業績，佢仲話信託股份「存在嚴重爭議」，喺爭議解決前唔會喺文件上面簽名確認。
爭議解決前 拒文件上簽名
據了解，雖然郭氏家族爭拗好似已經平息咗好一段時間，但其實最核心嘅信託股權問題根本無解決過，因為湘少一直唔承認自己無份持有家族信託權益，而又咁啱得咁橋，郭老太喺9月新意網出年報前卸任唔做新地主席，二佬阿江同細佬阿聯齊齊上位做聯席主席，唔通郭老太一行轉背唔睇住，幾兄弟又想嗌大交？
小琴就聽講，郭大少家啱啱出咗埠，會唔會循法律途徑討論下呢筆信託權益誰屬都仲未知，但話唔定佢會考慮下去證監會了解有關個信託股份轉名嘅事。雖然話一家唔知一家事，不過小琴都唔想見到郭氏家族幾兄弟有拗撬，希望大家家和萬事興，快脆啲搞掂呢單股權爭議啦。
email:piano@mingpao.com
回應 (0)
