平保業績會 疑似做媒勁「硬銷」

【明報專訊】上市公司為顯示親民，鍾意搞網上直播業績會，等網民同班管理層「面對面」，之不過好多時都有唔少趣怪事發生。好似昨日公布第三季業績的平保（2318）咁，竟然有人問副總經理兼首席財務官姚波，同董事會秘書姚軍，兩個咁英俊，係咪有親戚關係……唔知係咪有心玩嘢，堂堂業績會上咁問法，叫管理層點答呢？姚軍答佢﹕「這是個很有意思的問題，謝謝你的提問。」暗串一番，兼否認親戚關係。

既然難得同管理層「直接對話」，有買咗平保股票，坐足3年艇嘅股民乘機發難，質問平保股票仲有冇價值。點知姚波個答案夠晒絕﹕「股市有風險，投資需謹慎。」會上仲有一啲疑似打手，特登問吓平保在「最佳中國品牌價值排行榜」，位列前6名有咩感受，又有人問在「中國低碳典範企業評選」得獎情况，總之「硬銷」到爆。