綠城主席 漏夜澄清無執笠

【明報專訊】內地大力調控樓市，唔少地產商都叫苦連天。響限購令城市有唔少樓盤嘅綠城（3900），前兩日畀人傳佢資金鏈緊張、申請破產，仲有內地記者因此響噚日凌晨時份打電話畀綠城老總宋衛平求證，結果唔知應該好嬲定好笑嘅宋老總索性黎個「挑燈夜書」，響深宵時份寫下一篇澄清文章。

宋老總話，傳聞子虛烏有，綠城一切尚好，離破產仲有好遠一段距離。佢又講到，除咗努力催谷銷量，綠城仲有出讓項目部分股權呢一招去解決資金問題，所以有信心渡過樓市寒冬。

唔知係咪夜晚寫文會筆興大發，宋老總澄清完自己公司，再提及行業情况，原來佢好擔心響量價齊跌，市場萎縮之下，加上信貸緊縮，可能會令一部分地產商難過年關，到時出現溫州民企翻版，倒閉嘅倒閉，走佬嘅走佬，甚至「更多的悲劇要發生」。

其實綠城已經唔係第一次畀人傳唔掂，9月嗰陣就有消息話銀監會要調查佢信託融資詳細情况，結果證實誤傳，今次話佢破產，好大可能係因為綠城單單上半年嘅淨資本負債比率已經去到163%，居內房之首有關。