郭炳江愛膠表 每隻350元

【明報專訊】好多人都有個錯誤嘅諗法，以為有錢人就一定周身名牌，不過小琴可以話畀大家聽，世事無絕對，好似新地（0016）聯席主席郭炳江就熱愛戴電子膠表，佢手上呢隻表（見圖）經常陪佢出入大小場合，但價錢絕對實惠，每隻只賣351蚊港紙，分分鐘仲平過長實（0001）主席李嘉誠手上隻精工表。

話說郭二少啱啱喺9月先升咗職，同細佬郭炳聯齊齊坐正新地做聯席主席，但佢噚日出席公開活動，小琴一眼就睇見佢依然戴住呢隻陪佢出入過好多大大小小場合嘅電子膠表，初初都以為呢隻膠表係貴嘢，但睇真啲原來只係一隻Timex電子表。

睇返Timex官方網頁，二少呢隻原來叫做「Timex Ironman 30-Lap Full」，夜光、計時同鬧鐘功能一應俱全，每隻價錢都只係賣45蚊美金（約351港元），小琴呢啲打工仔戴住隻表都貴過佢，二少升職都唔換表，睇嚟佢份人認真長情喎！