董建華大仔 任東方海外執董

【明報專訊】東方海外（0316）噚日宣布，董建華嘅大仔董立均，亦係公司現任主席兼行政總裁董建成嘅侄兒，獲升任公司執行董事。今年47歲嘅董立均，持有美國常春藤名校普林斯頓大學學士學位，同史丹福大學工商管理學碩士學位。

擁史丹福大學工商管理碩士

董立均喺1993到1998年，曾經喺東方海外出任多個職位，其中就包括東方海外航運冷凍業務嘅董事。後尾又去到港龍航空工作，最高職位至公司營運總裁。跟住由2006年開始，就一直喺東方海外嘅子公司東方海外航運擔任管理層職位，曾任董事總經理同營運總裁。同時又喺東方海外嘅另一間子公司Cargosmart任董事。其他副職，仲有國際商會運輸及物流委員會副主席，同埋利和經銷嘅獨立非執董。

曾任職港龍利和經銷非執董

今次董立均就任東方海外嘅執董，初步任期為3年，之後每3年續期一次。公告話，董立均現時未持有東方海外嘅股份。

其實早喺2005年，董建華嘅二子董立新就先於大哥一步就任東方海外嘅執董。因公司創辦人董建華之父董浩雲離世後，公司直接交畀長子董建華繼承，所以第三代中，二仔先於大仔就任執董咁嘅要職，響當年一度備受外界議論。董立新亦都順理成章成為東方海外嘅第三代接班人。時隔6年，大哥又升埋做執董，同細佬平起平坐，唔知兩位二代船王係點考慮？

email:piano@mingpao.com