盛智文拖拍檔落水 大曬肌肉

【明報專訊】有「扮嘢文」之稱嘅蘭桂坊及海洋公園主席盛智文，將親自上陣宣傳嘅文化亦帶到內地，噚日下午現身海南海口市，出席蘭桂坊旗下項目啟動儀式時，就拉埋合作伙伴觀瀾湖主席朱鼎健落場，兩人唔單止揸高球車、玩巨型高球、浸溫泉，兼且大曬肌肉添！

蘭桂坊旗下海南項目啟動

咩項目咁巴閉？咪就係早前宣布嘅蘭桂坊同內地高爾夫球會發展商觀瀾湖合作嘅大型綜合休閒項目囉！盛智文一直銳意將蘭桂坊模式複製到內地，呢個海南蘭桂坊已經係佢搞嘅第三個類似項目，早前佢喺四川成都同廣州都分別發展蘭桂坊，但今次特別之處就係項目融入咗度假元素。小琴聽聞，海南蘭桂坊將位於已經開幕嘅觀瀾湖海口國際高爾夫度假村內，總建築面積會達到240萬平方呎，除咗例牌嘅酒吧同酒店，仲有購物長廊、文旅坊、人工湖，當然仲未計原本嘅高球場。不過，項目要到2013年先至落成，仍要等多一排先有得體驗。