MSCI指數 改中文名叫明晟

【明報專訊】提出指數、風險收益組合分析等服務嘅MSCI，噚日公布佢係大中華區嘅中文名，叫做「MSCI 明晟」，寓意前景光明，即係以後MSCI中國指數，就會變成MSCI明晟中國指數啦。MSCI全球主席兼首席執行官Henry Fernandez就話，中國市場愈嚟愈重要，為咗表示對中國市場嘅重視，公司特別設計新標誌同中文名，增强公司辨識度咁話。

Fernandez又話，從地理上嚟講，中國業務係公司客戶同收入增長率最高嘅地區之一。2005年MSCI喺上海設立第一間內地辦公機構。家喺北京、上海同埋香港擁有超過180名員工，喺大中華地區有超過200個客戶。

一直畀市場叫做「摩根士丹利資本指數」嘅MSCI，原來喺2009年已經同母公司大摩剝離，家大摩只係揸住一成股份，所以以後可能都係叫佢做「明晟」會開心啲。