明富傳水緊 顏偉洪：港暫時無事

【明報專訊】「歐豬五國」喺阿爺出手後終於叫做見到一線光明，不過之前加注買重歐豬國債嘅美國期貨交易商明富環球（MF Global）就中晒招，噚日就盛傳佢哋陷入水緊，唔單止俾銀行暫停咗信貸額度，仲有交易商拒絕同佢哋交易。小琴尋日第一時間打咗畀上年跳槽加盟明富嘅地產股星級分析員顏偉洪，佢話而家香港公司無乜受到影響，不過似乎加人工就無乜可能嘞。

明富喺香港知名度唔算好高，但上年9月顏偉洪跳槽加盟之後即刻多咗好多人識，佢同小琴講香港公司呢邊就無乜影響，而家亦都聽唔到有裁員減薪嘅消息，不過講到加人工呢，佢就話恐怕真係唔使點諗咯。

報道：有交易商拒交易

美國傳媒就好關注明富水緊傳聞，好似《彭博》引述消息人士報道，明富喺銀行兩個信貸額度已經被停止，《華爾街日報》就話最少有一個交易商已經拒絕跟明富進行交易，可能同擔心明富水緊有關。市場盛傳，明富今次水緊同一年前重槌買意大利、西班牙、比利時、葡萄牙和愛爾蘭國債有關，不過佢哋星期二（25日）就曾經同對投資者講，話公司仲有13億美元未動用信貸，唔使擔心咁話喎。