內地男士撐港BURBERRY半邊天

【明報專訊】內地人出咗名鍾意嚟香港掃名牌，小琴都好明白女人愛購物嘅本色，不過唔講唔知，原來內地男人同女人一樣，都好鍾意選購名牌。英國名牌BURBERRY嘅CEO Angela Ahrendts前幾日就話，內地人貢獻香港區銷售一半，其中喺海港城嘅分店，中國男士嘅消費同女士平起平坐，可以提高成間店嘅銷售。

Ahrendts出席廣東道一間新分店嘅開幕時話，中國區嘅銷售，男士貢獻嘅比例特別高，事實上喺成個亞洲區，男士消費比例都比其他地區高3至4倍，亞洲男士都係愛漂亮㗎。

香港分店 全集團最高生產力

Ahrendts又話，家集團對於內地顧客非常重視，除咗喺歐洲、英國同美國嘅分店，都聘請能操普通話嘅銷售員，嚟應付中國旅客嘅需要之外，仲話香港由於有大量內地旅客嚟到消費，香港嘅分店係集團最有「生產力」嘅分店。

至於香港銷售最好嘅分店，就當然係自由行旺區，位於尖沙嘴嘅海港城，Ahrendts話廣東道分店開咗兩禮拜，已經好快會成為第二銷售最好嘅分店。佢又話，BERBURRY計劃未來幾年喺中國擴充分店，會由家59家，增加去到100家。

BURBERRY又提到，東南亞區都係集團一個重要市場，因為佢喺facebook嘅粉絲，好多都係嚟自東南亞區，所以好有發展潛力喎。

email:piano@mingpao.com