利嘉閣前老闆 變身發展商

【明報專訊】利嘉閣前老闆羅林渭（圖）近年行事低調，原來靜靜雞做埋發展商。佢同老婆禹貞姬等，透過福宜國際有限公司發展九龍城南角道1C及3號項目，上月獲屋宇署批建18373方呎商住樓面，包括1幢24層高商住大廈。昨日小琴致電羅林渭，佢話呢次係自己首度起樓投資，或者將呢幢嘢發展為服務式住宅，以便作長線收租用途。

700萬買入九龍城舊樓

原來羅林渭投資有道，佢話想當年，佢喺03至04年樓市低潮時買入呢幢舊樓，當時成幢樓都只係約700萬元，等於家一個太古城兩房單位咁上下，其後地舖同舊樓上面單位一直收租。到呢幾年東九龍概念興起，呢個地盤咁啱就鄰近沙中線站，故此索性小試牛刀，將呢幢大廈重建，成自己嘅心血結晶！

01年羅林渭將旗下利嘉閣售予中原施永青後，現時作風已轉為低調，問及有否興趣再重操故業開地產代理公司，他就話暫時未有計劃。

另外，恒地（0012）李兆基家族於去年以18.2億元購入山頂白加道35號屋地，繼今年初獲批圖則後，上月再獲批另一份圖則，獲批建26908方呎住宅樓面，包括3幢3層高洋房及1幢康樂設施等。