新聞類別
財經
詳情#
【明報專訊】新地（0016）郭氏家族自從「分家」後，大哥郭炳湘嘅一舉一動都備受注目，噚日新地出咗年報，睇到大郭生今年4次董事會全部no show，莫非屋企有拗撬？大郭生發言人就話小琴諗多咗啫，原來大郭生今年好忙，經常飛來飛去，幾次董事會都唔喺香港或者有緊要事，其中一次仲好似係陪郭老太出差添！
睇番新地份年報，董事出勤普遍唔差，一班執董好似老臣子鄺準、啱啱升咗做聯席主席嘅二哥郭炳江同細佬郭炳聯，今年全部4次董事會從未缺席，非執董出席率就低啲，好似郭老太咁就只係出席咗兩次，不過大郭生就仲誇張，出席率食咗零蛋。
發言人：咁啱都唔喺香港
小琴噚日打畀大郭生，諗住問下佢做乜咁曳曳唔開會，可惜佢飛咗去外國做嘢，不過大郭生發言人就笑笑口叫小琴唔使咁擔心，佢話印象中大郭生幾次董事會都咁啱唔喺香港，有時幫新地周圍睇吓項目，有時又開吓政協會議，佢仲話記得有一次大郭生仲係同郭老太一齊出差，所以先出席唔到董事會。
新地今年都有唔少變動，好似家族基金權益改由大郭生家人持有咁，但早排郭老太劈炮唔做主席專心搞慈善，由二哥阿江同細佬阿聯頂上，大郭生即日刻表態話安排好正常，家日常運作都係由兩個細佬負責，講晒好說話撐佢哋上位，照咁睇大家關係似乎都仲算唔錯，咁咪好囉，古語都有云，家和萬事興吖嘛。
小琴密語
email:piano@mingpao.com
回應 (0)
