中央政策撐腰

【明報專訊】「商界才女」梁鳳儀隻勤+緣（2366）股價近排大上大落，直頭炒到好似變咗牛熊證咁，噚日又大升接近六成，噚日仲公布話可能供股集資，原來後面有中央政策撐腰。小琴睇番內地報道，原來中央要求推動文化產業成為國民經濟支柱性產業，即刻令到內地啲電影股、傳媒股喪炒，咁啱早排先傳話有唔小投資者吼實勤+緣，睇嚟真係皇帝女唔憂嫁喎。

早幾日有內地報道話，中央要求推動文化產業成為國民經濟支柱性產業，要大幅提升文化產業地位，範圍包括出版發行、影視娛樂、廣告印刷、演藝會展等等，搞到內地A股啲文化傳媒板塊呢幾日炒到飛天。

勤+緣股價 單日升六成

才女不嬲都sell勤+緣主打嘅內地廣告同電視電影業務，可能係政策因素，尋日全日升左58%，公司尋日仲出咗個通告，話同一個包銷商傾緊供股集資，而家業務食正晒政策條水，應該唔憂搵唔到投資者。小琴噚日打過畀才女，佢就似乎好忙所以無聽，所以證實唔到。不過睇返佢早排同傳媒講，近排經常有投資者因為睇好內地文化產業發展，主動敲佢門想入股勤+緣，但係就暫時未有邊個傾得成。而家睇嚟，似乎真係唔憂嫁喎。