新聞類別
財經
詳情#
【明報專訊】「有人辭官歸故里，有人漏夜趕科場」，呢排個市靜過鬼，小琴好多經紀朋友都呻拍烏蠅，有啲證券行又割喉式減佣金，偏偏六福集團（0590）非執董許照中，就喺呢個時候幫六福大股東兼行政總裁黃偉常搞檔六福金融，最快下個月開張。
史提芬（許之洋名）話，香港大部分大型珠寶金行都有涉足證券生意，其實六福10年前已搵過佢搞呢盤生意，事隔10年，史提芬離開僑豐但又唔想退休，決定同黃偉常再創高峰，用大約億六銀搞證券行，黃生佔一半，史提芬另外搵返嚟嘅10幾個股東佔另一半，開業頭半年打算請六、七十人，1年後估計員工人數會過百人。
伙拍黃偉常搞證券行
早兩日有證券行以出位價每單窩輪或牛熊證trade收佣4.88元作招徠，史提芬覺得呢個玩法有損經紀嘅專業形象，即將開張嘅六福金融都唔打算靠低價佣金搶客，而係靠好服務吸引客戶喎。
今年六十有四嘅史提芬坦言，希望今鋪會係佢收山代表作，雖然今趟開檔吹逆風，佢就冇有怕，皆因佢次次開新檔都係淡市，捱得一年半載好景就會降臨！
至於近排中小經紀行對於市場沽空，以及輪證印花稅有唔少意見，史提芬話就輪證重新開徵印花稅相當困難，因為好難走回頭路，但係都認同可以研究吓點樣降低個市場嘅投機氣氛。
email:piano@mingpao.com
回應 (0)
