耀才撼「5蚊證券行」

【明報專訊】近排大市chok上chok落，唔少散戶就索性轉炒窩輪同牛熊證諗住搵快錢，本地證券行為咗搶呢班客仔，就不惜割喉式減價，繼早排有證券行推出5蚊一次交易佣金，耀才證券（1428）噚日就宣布將佣金進一步減到4.88元，仲寸爆「5蚊證券行」無知名股東支持，用到出口術呢招，睇嚟真係生意難撈喎。

近排市場興玩即日鮮，好多散戶一窩蜂轉炒窩輪同牛熊證，話得做即日鮮，買賣梗係要比正股頻密得多，早排就有證券行推出優惠，不論你買賣金額係幾多，每次交易一律只收5蚊佣金，實行靠谷大個交易量嚟搵食，即刻震撼市場，有老友都同小琴講「5蚊跌都跌咗啦」，果然唔少散戶聽見咁抵即刻開戶。

唔知耀才係咪唔抵得「5蚊證券行」，噚日宣布索性將交易佣金減到4.88元，仲寸爆咁話對方唔似耀才咁係上市公司，註冊資本仲同佢哋爭成10倍，仲話耀才股東有交行（3328）旗下交銀國際，而對方就無。