新聞類別
財經
詳情#
【明報專訊】騰訊控股（0700）年初拍住美國團購網Groupon入華，今年3月開檔「高朋網（Gaopeng）」諗住大殺四方，點知短短幾個月便傳出裁員，Groupon最近嘅上市文件更顯示團購有幾燒銀紙，今年頭3季高朋網虧損足足4645萬美元（約3.6億港元），佔股四成嘅騰訊大概要承受1840萬美元（1.4億港元）嘅虧損。
年初已揚言上市嘅美國團購網Groupon上市之路，更係頭頭碰着黑，不但被質疑會計手法誇大收入，最後要撞正喺家吓市况咁差先啟動上市，新浪科技噚日更加發現Groupon喺美國證交會嘅文件，披露高朋網由今年1至9月底，蝕足3.6億港紙，即係每個月蝕3900萬港元。依照高朋網嘅股權分佈，Groupon佔股49%，騰訊透過子公司持有四成股權，另外一成就係由「網絡狂人馬雲」所創立嘅雲鋒基金擁有。可以推斷騰訊喺頭9個月大約承受約1.4億元嘅虧損。
馬雲旗下雲鋒基金擁一成
其實唔少人一開始亦認為，Groupon即使拍住騰訊入華，都肯定會水土不服。睇返公司盤數又確實如此，高朋網頭9個月嘅營銷額大約係1.4億港元，真正落袋嘅收入就只有1670萬港元。截至9月底，公司嘅流動資產8500萬港元，流動負債則高達1.2億港元，以公司之前嘅燒錢速度，相信只要捱多兩個多月又會有融資需要。之但係，公司由成立至今，已由股東手上集資3.7億港元，股東願唔願意再投資呢，昔日高調入華嘅高朋網，當今已演變成食之無味、棄之可惜嘅雞肋。
email:piano@mingpao.com
回應 (0)
