營商便利度 港屈居阿二

【明報專訊】噚日世界銀行發表一份營商環境研究報告，列出中小企最適合的營商地區排名，香港依然排新加坡後面屈居第二，原因主要係香港物業登記上做得慢，唔夠新加坡快。不過世銀同時稱讚香港創業及電力接駁兩方面有改善，仲話香港電力網絡連接需要天數，較舊年大減一半。
物業登記慢過新加坡
世銀報告話，香港公用設施服務商可以提供有效率服務，今年電網連接就由93天減至43天，可以為企業提供有利營商環境，又話香港發展網上服務同科技運用，有助中小企創業。
不過，香港再次輸畀新加坡原因係，物業登記制度遜於新加坡，呢個指標中，本港排名57位，新加坡就排14位。世銀旗下國際金融公司發言人Charles Schneider就話，如果香港可以簡化物業登記程序，同埋縮短時間，排名可以超越新加坡。
電力供應唔掂 中國跌排名
至於中國，今年就排第91位，Charles Schneider話亞太區內，中國過去6年盡力營造良好企業營商環境，係進步最大地區。佢又話，中國過去7年落實公司法及破產法等，有助改善內地營商環境，不過今年中國整體排名由87位跌至91位，主要原因係過往排名未計及電力供應，而中國電力供應方面又做得比較差喎。