香港資源 借金做生意

【明報專訊】內地銀行水緊，民間借貸又動輒十幾厘息，唔少公司都大嘆經營艱難。不過，以「金至尊」品牌係中港經營金飾零售業務嘅香港資源（2882）就唔擔心呢樣野，公司主席黃英豪同小琴講，佢哋向銀行借實金而唔借錢喎。

年息4厘半 抵過借錢

黃英豪話，下半年金價大幅波動，公司用存貨抵押借實金返嚟做生意，一嚟避免自己坐貨，二嚟周轉率都提升咗，年息都只係4厘半，實在係抵過借錢。

佢話公司由今年8月份起，至今已借咗1億元、約250公斤嘅實金。「銀行好願意借畀我哋，因為借金唔同借錢咁有額度，而且對佢嚟講屬於資產負債表外項目。」話晒係借，始終要還，到時公司都係要從市場買金，黃英豪話，公司已買咗黃金期貨對冲，但佢強調，公司咁做目的係管理風險，唔係投機炒賣，希望金價維持穩定喎。