港龍新CEO下月開show唱歌劇

【明報專訊】港龍新CEO楊偉添（Patrick）回巢後噚日同一班記者行家茶聚，言談甚歡，席間佢仲不時爆出高八度笑聲，一問大家先知原來Patrick係男高音，下個月仲會開個演唱會唱歌劇。
Patrick話佢細個讀聖保羅男女中學，加入學校男女合唱團，由於媽咪係粵曲高手，所以佢就選擇唱男高音。唱歌呢團火未有因佢投身社會而熄滅，Patrick加入旅發局後受嘉華國際（0173）主席呂志和個女感染，一齊拜師有「中國之鶯」之稱著名歌唱家，今年已經95歲周小燕學唱歌劇，而Patrick仲透露下個月就會登上大舞台，一展歌喉。
港龍噚日向小琴介紹秋冬飛機餐，Patrick仲親自一一為大家夾，又慢慢講唱歌同平時講運氣分別，講得興起仲會笑到全場都聽到，又會拍拍行家膊頭，盡展親民一面。
介紹秋冬飛機餐 表現親民
Patrick31年前加入太古集團，有20年工作同航空有關，又做過船務同國泰假期董事總經理，可謂周身刀。佢07至09年做過港龍同國泰中國區總經理，負責管理內地業務，回巢港龍之前就係太古（中國）董事及總經理暨駐中國首席代表。
email:piano@mingpao.com