陳啟宗﹕反對起居屋 好似不近人情

【明報專訊】特首臨別秋波送大禮，宣布復建居屋之餘，更將補地價嘅參考價，由市價改做買入價，搞到一眾無殼族都心郁郁想買返間。香港其中一個「意見領袖」、恒隆地產（0101）董事長陳啟宗噚日話，喺過去7至8年，政府唔肯聽發展商意見，一直都冇主動賣地，搞到供不應求，但無辦法，家樓咁貴，話反對起居屋好似有啲不近人情。

直至到近一兩年，煲呔先至定期賣地，仲話明每年有幾多單位供應，等發展商有數得計，陳啟宗都話大方向正確。不過佢重申本來佢唔贊成起居屋嘅，如果政府當年保持穩定土地供應，根本唔需要起（居屋）。

講到佢早排買嗰塊昆明地皮，佢就笑到好似抱孫咁，讚佢位置似「香港嘅置地廣場」，畀人買咗，可能成百年都買唔番喎。