蘭桂坊 登陸海南島

【明報專訊】「蘭桂坊之父」盛智文又有新搞作，最新伙拍高球朋友一定會識嘅觀瀾湖，喺海南島海口市打做一個全新嘅蘭桂坊出來，睇嚟別有一番風味。小琴一諗起可以飲住杯Dry Martini、打住高爾夫球，椰林樹之下，實在不亦樂乎。

事實上，盛智文近年喺四川成都同廣州分別發展「內地蘭桂坊」，兩個蘭桂坊小琴都未親身上過去，不過較新嘅廣州蘭桂坊，似乎目前發展就唔算太順利，因為開業時間延期、總經理辭職、營運大權亦畀咗當初嘅競標對手。盛智文今次海口打造蘭桂坊，最特別就係同埋觀瀾湖合作，佢同觀瀾湖朱鼎健，今日就會現身介紹發展大計。

成都廣州蘭桂坊 已落成

海南島全省都實施咗免稅優惠，曾幾何時小琴都擔心搶咗香港作為購物天堂嘅好多客源，不過當地品牌始終無香港咁豐富，大家都唔駛驚住。海南島一向人傑地靈，加埋電影《非誠勿擾2》去當地取景，成為內地旅遊熱點之中嘅熱點，貪佢有東方夏威夷味道，家加埋個蘭桂坊，以後仲唔係一班老外嘅天堂？

其實就算唔係盛智文帶頭，好多省市都已仿效蘭桂坊嘅發展模式，但點都係A貨，唔夠正宗。其實蘭桂坊集團亦有同杭州市政府密切合作，逐步落實杭州蘭桂坊嘅設計同埋審批，雲南、蘇州、重慶亦被納入蘭桂坊集團下一步發展嘅考慮之中。

email:piano@mingpao.com