人幣公斤條黃金 首日成交過億

【明報專訊】人民幣概念炒極唔完，金銀業貿易場講咗好耐嘅人民幣計價公斤條黃金，噚日終於面世，貿易場首日現貨黃金上板交收，交收量有成322公斤，結算價每克346.95元人民幣，即係等如1億幾銀人民幣，成績都算係咁。

其實貿易場今年5月中已經開始試行呢個人民幣公斤條黃金，經過幾個月來連串模擬測試後，終於正式推出。為咗隆重其事，貿易場噚日堆咗個「小金山」出嚟，靚女公關話，個小金山有成52條公斤條黃金，用人仔計值成1800萬架。

金銀業貿易場理事長Haywood張德熙就話，香港依家人民幣存款有大概6000億元，為咗唔好對結算構成壓力，金銀業貿易場初步目標每日交收上限定為300公斤，相信短期內人民幣公斤條交易能佔每日整體黃金條交易半成至一成，半年內提升至30%㖭！