內地假網站 冒中石化騙財

【明報專訊】坊間流行一句說話「中國什麼都假，只有騙子是真的」，雖然呢句說話同小琴一樣咁mean，但又真係好難反駁。繼香港賽馬會同港交所（0388）早排被內地用虛假網站同排頭招搖撞騙後，今次輪到中石化（0386）母公司嘞。

話說中石化集團同工行（1398）有個聯營優惠，發短訊畀客仔推廣油卡增值，個短訊仲有個網址連結。然後，事情就好似警訊啲劇情咁，有不法之徒用個假網址（據講同真網址只差一個英文字母）犯案，結果喺9月1日至10月15日期間，發生咗超過30宗騙案，其中15宗喺杭州發生。

案情其實都係大同小異，受害人用百度搜查咗個假網址，然後跟住個指示用支付寶轉帳，諗住幫自己張油卡增值，結果錢就扣咗，但張卡又冇增值，再打電話去中石化度投訴，先知道自己中招。據報道，30幾宗騙案涉及金額達到10萬蚊，賊人仲未拉到，受害人唯有嘆句唔好彩。