比亞迪問阿仔借錢險難產

【明報專訊】屋漏兼逢連夜雨嘅比亞迪股份（1211）今年認真流年不利，遇上內地收水，比亞迪唯有同「囝囝」比亞迪電子（0285）「度水」，借10億元人仔，「囝囝」比亞迪電子噚日總算喺股東大會同意向「阿媽」雪中送炭，不過46%出席股東會嘅比亞迪電子股東認真唔畀面，投下反對票，搞到議案都差啲流產。

比亞迪電子噚日喺深圳搞股東大會，表決應唔應該向盈利大倒退嘅「阿媽」借錢，由於單刁係關聯交易，大股東冇得投票，最後僅僅由53.7%嘅出席股東贊成，46.2%股東反對，驚險通過。

比亞迪電子向阿媽借10億人仔委託貸款，同樣收以浮動息率計嘅利息，睇落去比亞迪電子計埋計埋都有着數。之但係，家吓咁多內地企業走佬走數，比亞迪電子噚日市值都唔夠48億港紙，借10億人仔又絕對唔係少數目，難免股東會「Say No」。

有股壇長毛之稱嘅David Webb抨擊過母子公司貸款，好難控制風險，公司有閒錢借畀別人，不如加派息好過，相信佢呢番說話都道出唔少股東心聲。睇怕比亞迪向阿仔借錢呢條米路，可一不可再。

David Webb：有閒錢借不如加派息

今時今日，BYD（比亞迪）已經畀人取笑為Break Your Dream（夢想破滅），年初至今跌咗足足63%，加埋同樣流年不利嘅思捷（0330）同李寧（2331），簡直可堪稱成今年「港股三煞」。

email:piano@mingpao.com