吉林爆出股民燒證券行

【明報專訊】正所謂眾怒難犯，如果呢個「眾」係講緊內地股民嘅話，就更加難犯。小琴之所以咁講，皆因噚日喺內地網站見到一段新聞，話懷疑有憤怒嘅股民放火燒咗吉林市一間叫東北證券嘅證券行，如果件事係真嘅話，喺內地做金融行業都真係隨時會變成高危行業。

話說噚日內地一個叫「太極牛網」嘅網站，喺微博發出一則題目「東北證券吉林公主嶺營業部今天下午被憤怒的股民點燃」嘅消息，仲上載咗幾張相，相入面可以見到東北證券所在嘅大廈火勢猛烈，網站消息就話大火產生嘅黑煙有成幾十米高，當地消防部門出動咗3架消防車救火，喺半小時內救熄咗場火。

內地股票呢幾年跌多過升，好似上綜指今年初到家都跌咗一成半，內地股民自然怨氣沖天，好似早排小琴先聽過有個老股民話自己炒股票輸足十幾年，嬲得滯決定戒炒股票兼絕食，所以雖然今次燒股票行單嘢真定假都仲未知，但都唔可以話無可能，咁睇嘅話，長毛噚日放氫氣球示威，都算斯文咯。